خطة حساس الجيل لإفساد الجيل (( تأليفى مش منقول ))

طمبورة ملك الجيل ده ذكى و الله و فى منتهى الذكاء

ده طلع أذكى من عمرو دياب كمان آه و الله

أصل خطته إللى هو حطها نجحت نجاح ساحق و تحدت أى حد

هتقولولى أى خطة بالظبط

هقول لكم خطة إفساد الجيل

و هشرح لكم الخطة دى واحدة واحدة

فى البداية كان عامل كام أغنية لزيزة و شبابية و كان بيطلع فى برامج فى التليفزيون المصرى و معاه جيتار و يغنى أغانيه دى بالإضافة لأغانى عمرو دياب معتمدا على موهبته و صوته و دى حاجة معترف بيها ... كل ده علشان الناس تقول الولد ده هيكون خليفة عمرو دياب

و جت فرصة تعرفه على نصر محروس فرصة من ذهب علشان ينتج له شريط مع المطربة إللى هو طلع على أكتافها و إللى بيشتمها هو و جمهوره حاليا و ناشرين نمرتها على الإنترنت ... الحقيقة إن شيرين نجحت نجاح ساحق و أغنيتها آه يا ليل نجاحها عدى كتييير نجاح أغنية تامر حبيبى و إنت بعيد

و بكده الثنائى ده اتعرف ... و كان تامر فى البداية عامل أغانى فى منتهى الجمال و ده جزء من الخطة ... إنه يتسلل فى هدوء بعدين يقولها بمنتهى الصراحة إنه واحد طاقق و مش هامه و طالع ياخد مكان عمرو دياب (( بس على مين طبعا ))

و فى ألبوم حب تابع مسير الخطة و عمل ألبوم رائع مليان أغانى بجد و هى دى إللى عملت تامر حسنى

بعدين جات حكاية الهرب من الجيش و هنا كانت بداية الخطة الفعلية

أول حاجة اتهرب من الجيش بعدين عمل فيها مظلوم و كان ضحية لواحد مزور (( أو ضحية لعمرو دياب يمكن )) و الناس طلعت فى مظاهرات بتقول إن تامر مظلوم و اتعمل له بوستر عملاق مكتوب عليه وحشتنا

بدل ما يبقى مجرم فى حق بلده بقى بطل

و بكده كل عقل الشباب و فهمهم إن إللى بيهرب من الجيش ده مش مجرم ده شهيد

بعدين جت بداية الخطة إنه يعمل ألبوم متوازن فيه الأغانى الحلوة أوى زى بعيش و الأغانى إللى كانت بداية الانحدار زى إنتى إللى عملتى

ألبوم عينيا بتحبك

لو تلاحظوا أغانى الانحدار دى كانت بتتدرج للأسوأ فى كل مرة

يعنى إنتى إللى عملتى هتلاقوها مش للدرجة دى

بعديها فى ألبوم يا بنت الإيه هتلاقوا اعتذرى و التلميح الجنسى الصريح طبعا غير وقفتى تتنطتى و على إيديكى

بعدين فى قرب كمان أغنية قسمة و نصيب إللى فيها تصريح باللى حصل بينهم ده غير أغنية وحياة أمى و الانتقال للشتيمة الصريحة و أغنية هى دى و الحاجات إللى كلنا شفناها فى الكليب

بعدين فى الألبوم ده لقى إن جمهوره بتاكل عقلهم حكاية إن الأغنية فى الألبوم أو مجرد دعاية لفيلم

راح ما حطش حاجه فى الألبوم بس عمل الأغنية الكارثة خليها تاكلك

بعدين لما صور كليب تاعبة كل الناس أبرز الإيحاءات إللى فى كلماتها زيادة

أنا هنا عايزة أوضح إن الأغنية دى كان ممكن تفوت لولا الكليب بتاعها

انتقل انتقال مباشر من البص فى كليب هى دى للتحرش الفعلى

و لاحظوا هنا التدرج إللى فى منتهى الذكاء

فى الأول أقنعهم يهربوا من الجيش

بعدين خلاهم يعاكسوا فى بنات الناس (( بالإيحاءات الجنسية ))

بعدين انتقل من المعاكسة للبص على أماكن حساسة

و منها للتحرش

و مستنيين اليوم إللى تعلمهم فيه الاغتصاب كمان يا تامر

ما تتأخرش ها لحسن المجتمع ما فيهوش اغتصاب أطلاااقا و إحنا عايزينها تولع يا نجم